ས་འཛིན་དཀར་པོའི་དྲ་ཚིགས།
མ་བརྗེད་དགོས།
མ་བརྗེད་དགོས།
གངས་དཀར་རྡུལ་ལ་ནག་ཐིག་མ་བྲིས་དགོས། །
གཙང་ཆུ་སྔོན་མོ་རྙོག་མ་མ་བྱེད་དགོས། །
ལྭ་བ་གདོང་དམར་སླད་ཀྱིས་མ་འདྲེས་དགོས། །
དགོས་པ་དེ་གསུམ་མ་བརྗེད་གངས་ཅན་པ། །
གདོད་མིའི་གདངས་ལ་ཅིན་སྒྲས་མེད་པར་དགོས། །
ཀ་མད་སུམ་ཅུར་སྒལ་ཚིགས་མ་ཐོར་དགོས། །
སྦྲ་ནག་ཁྱིམ་གཞིས་དུ་རླངས་མ་ཉམས་དགོས། །
དགོས་པ་དེ་གསུམ་མ་བརྗེད་གངས་ཅན་པ། །
ལྭ་བ་གདོད་མིའི་ཆོས་དེར་མ་སྡང་དགོས། །
ཤཱཀྱའི་ཐུབ་པའི་ཆོས་དེ་མ་ཉམས་དགོས། །
ཆོལ་གསུམ་ནང་དམེར་མ་སྦྱོར་ཆིག་སྒྲིལ་དགོས། །
དགོས་པ་དེ་གསུམ་མ་བརྗེད་གངས་ཅན་པ། །
མཐོ་སྒང་ནོར་ལུག་མ་བོར་བདག་གཅེས་དགོས། །
གངས་ཅན་གཤིས་བཟང་མ་ཉམས་འཛིན་སྲུང་དགོས། །
མེས་པོའི་རྗེས་བཤུལ་མ་བརྗེད་དེར་བསྙེགས་དགོས། །
དགོས་པ་དེ་གསུམ་མ་བརྗེད་གངས་ཅན་པ། །
ཕ་མའི་དྲིན་ལན་མ་དོར་རྗེས་དྲན་དགོས། །
བླ་མ་དམ་ཚིག་སློབ་མའི་མ་ཉམས་དགོས། །
བླ་མའི་སློབ་མར་བྱམས་སྐྱོང་མ་ཆུང་དགོས། །
དགོས་པ་དེ་གསུམ་མ་བརྗེད་གངས་ཅན་པ། །
དབུས་པའི་གུས་བསྟོད་གཤིས་བཟང་མ་དོར་དགོས། །
མདོ་སྨད་ཤེས་རིག་སྒྲོན་མེ་མ་ཉམས་དགོས། །
མདོ་སྟོད་སྙིང་སྟོབས་བདེན་དྲང་མ་ཡལ་དགོས། །
དགོས་པ་དེ་གསུམ་མ་བརྗེད་གངས་ཅན་པ། །
དགོས་པའི་གཤིས་བཟང་བྱམས་བརྩེ་མ་ཉམས་དགོས། །
དགོས་གལ་ཆེ་བའི་མི་རིགས་མཐུན་སྒྲིལ་དགོས། །
དགོས་པའི་རྒྱུ་མཚན་གནས་ལུགས་ཤེས་པ་དགོས། །
དགོས་པ་དེ་གསུམ་མ་བརྗེད་ཡིད་འཇོག་དགོས། །
ས་འཛིན་དཀར་པོས།
———
ངོ་བསྟོད་མིན་པའི་སེམས་གཏམ།
ངོ་བསྟོད་མིན་པའི་སེམས་གཏམ།
གླུ་མ་རིག་འཛིན་སྒྲོལ་མ།
ཀ་ལྟར་རིག་གཤིས་བརྟན་འཛིན་མ། །
ཁ་བའི་མདོག་ལྟར་སྒྲོལ་དཀར་མ། །
ག་དག་བོད་མའི་སྤྱོད་ཚང་མ། །
ང་ཡི་རྣ་བའི་དབྱངས་སྙན་མ། །
ཅ་ཅོའི་དྲི་མེད་རིག་འཛིན་མ། །
ཆ་ཆོ་མུན་སེལ་སྒྲོལ་མེ་མ། །
ཇ་ལོ་མདོག་ལྟར་བཅུད་ལྡན་མ། །
ཉ་གང་རྒྱས་པའི་ལུས་ཕྲ་མ། །
ཏ་ལེའི་རིག་དྭངས་མཚོ་འཛིན་མ། །
ཐ་སྙད་ལས་ལ་སྒྲོལ་མཁས་མ། །
ད་ལྟའི་རིག་པའི་དབྱངས་འཛིན་མ། །
ན་གཞོན་ཀུན་གྱིས་ཡིད་འཕྲོག་མ། །
པ་ཊའི་རིག་པ་སྣེར་འཛིན་མ། །
ཕ་མར་བྱམས་ལྡན་སྒྲོལ་དཀར་མ། །
བ་གླང་སྤྱོད་དོར་བག་ཡོད་མ། །
མ་མ་རིགས་རུས་རྗེས་འཛིན་མ། །
ཙ་རའི་རིག་བསྙེགས་དོན་འཛིན་མ། །
ཚ་གཟེར་སྐྱོ་གདུང་སྒྲོལ་མཛོད་མ། །
ཛ་དྲག་མི་རིགས་གཅེས་འཛིན་མ། །
ཝ་མོའི་སྤྱང་གྲུང་གོམས་མཁས་མ། །
ཞ་སྨྱུག་རིག་པའི་རྗེས་འཛིན་མ། །
ཟ་ངེ་ཟེང་ངེའི་གནས་སྒྲོལ་མ། །
འ་ཅག་མི་རིགས་བདེར་བརྩོན་མ། །
ཡ་རབས་ཕ་མའི་གོམས་སྤྱོད་མ། །
ར་བ་གངས་དཀའི་རིག་འཛིན་མ། །
ལ་རྒྱའི་གནས་ལ་སྒྲོལ་བརྩོན་མ། །
ཤ་ཁྲག་རིགས་རུས་གཅེས་སྐྱོང་མ། །
ས་དྲུག་མི་རིགས་སྤྱན་གཟིགས་མ། །
ཧ་ནི་བློ་རིག་ཡོངས་འཛིན་མ། །
ཨ་རོགས་མུན་སེལ་སྒྲོལ་བྱེད་མ། །
ཧ་རི་དར་ཅན་དབྱངས་བསྟོད་མ། །
ཨ་མའི་སྦྲ་ཁྱིམ་བདག་མོ་མ། །
ས་འཛིན་དཀར་པོས།
———
སྨན་གཞུང་མ་ཤེས་ན།
སྨན་གཞུང་མ་ཤེས་ན།
ནད་ལ་སྨན་གྱིས་བཅོས་ཚུལ་མ་ཤེས་ན། །
མུན་ཁང་འབེན་ལ་མདའ་ཡིས་ཚད་པ་འདྲ། །
འབྱུང་བཞིས་ནད་ཁམས་བསྟུན་ཚུལ་མ་ཤེས་ན། །
དབྱར་གོས་དགུན་དུས་གྱོན་ནས་བསྐྱོད་པ་འདྲ། །
མི་བུའི་ལུས་ཀྱི་གྲུབ་ཚུལ་མ་ཤེས་ན། །
རྒྱུས་མེད་མགྲོན་པོ་ལུང་ཐང་སླེབས་པ་འདྲ། །
ལུས་ཟུངས་ཁམས་ཀྱི་གནས་ལུགས་མ་ཤེས་ན། །
མིག་ལོང་མདུན་དུ་རྩིས་འཁོར་བཞག་པ་འདྲ། །
ཟས་སྐོམ་བྱ་སྤྱོད་བསྟེན་ཚུལ་མ་ཤེས་ན། །
ཤེས་མེད་བྱིས་པས་འོ་མར་ངོམས་པ་འདྲ། །
འབྱུང་བཞིས་སྨན་གྱི་སྦྱོར་སྡེར་མ་ཤེས་ན། །
བ་ལང་རྩྭ་ཟར་ཕྱོགས་མེད་བསྐྱོད་པ་འདྲ། །
ནད་རིགས་འབྱུང་རྩ་གནས་ལུགས་མ་ཤེས་ན། །
རྒྱུས་མེད་གཏམ་ལ་ཡིད་ཆེས་བྱེད་པ་འདྲ། །
སྨན་པའི་གསོ་རིག་ལྟ་སྤྱོད་མ་ཤེས་ན། །
འབྲེལ་མེད་མི་བུས་སྨན་ཚིག་སྐྱོར་པ་འདྲ། །
སྨན་གྱི་རོ་ནུས་ཞུ་རྗེས་མ་ཤེས་ན། །
ལྐུག་པས་ཟས་ཀྱི་རོ་ལ་མྱོང་པ་འདྲ། །
གཏར་བསྲེགས་དུག་རླངས་སྤྱོད་ཚུལ་མ་ཤེས་ན། །
སྤྲེའུས་བྱིས་པ་ཆུ་ལ་བཀྲུས་པ་འདྲ། །
མ་ཤེས་ཤེས་ཁུལ་བྱས་ནས་ལུས་ཟུངས་འཁྲུགས། །
མ་རིག་རིག་མདོག་བྱས་ནས་མགོ་ཉེས་ཤོར། །
མ་རྟོགས་རྟོགས་མདོག་བྱས་ནས་ནད་ངོས་འཁྲུལ། །
མ་བཅོས་བཅོས་མདོག་བྱས་ནས་ཚེ་སྲོག་དོར། །
ས་འཛིན་དཀར་པོས།
———
བོད་ཀྱི་བརྡ་སྤྲོད་རིག་པའི་སྐོར།
བོད་ཀྱི་བརྡ་སྤྲོད་རིག་པའི་སྐོར་ཀློག་འདོད་ཡོད་མཁན་དྲ་གྲོགས་རྣམས། འདིའི་སྒང་ལ་མནོན་རོགས། Tibetan Gramar1.swf (1,7 MB)
———
Items: 1 - 4 of 4
གླེང་གཞི: མདུན་ངོས་བརྩམས་གསར་ཁག
| Date | 23/01/2011 |
|---|---|
| By | རྡོ་མི། |
| Subject | དྲྭ་བ་ཡག་པོ་བཟོས་འདུག |
ས་འཛིན་དཀར་པོ་དྲྭ་བ་ཡག་པོ་ཞེ་དྲག་ཅིག་བཟོས་འདུག
———
| Date | 24/01/2011 |
|---|---|
| By | མིག་ཤེལ་ |
| Subject | ཡག་པོ་འདུག་ |
ས་འཛིན་དཀར་པོ་བཀྲ་ཤིས་བདེ་ལེགས་ཞུ།
———
| Date | 26/01/2011 |
|---|---|
| By | ཆུ་འཛིན། |
| Subject | དྲ་རྒྱའི་སྐོར། |
ཁྱེད་ཀྱིས་དྲ་རྒྱ་འདི་ཞེ་དྲག་པོར་བཟོས་འདུག སླར་ཡང་གནས་ཚུལ་གསར་པ་དང་ཤེས་ཡོན་སྐོར་སྤེལ་བའི་སྨོན་འདུན་ཞུ།
———
| Date | 04/02/2011 |
|---|---|
| By | འབྲོང་ངུར་དཀོན་མཆོག་བུ་ཆུང་། |
| Subject | གྲོགས། |
ཁྱེད་ཀྱི་དྲྭ་རྒྱ་ཤིན་ཏུ་ལེགས། ཟིན་བྲིན་སྐབས་སུ་ཡི་གེ་ཞེ་དྲག་གི་ཆུང་ཆུང་འདུག་བཟོ་སྒྲིགས་གཅིག་བྱོས་དང་། བཀྲིས་བདེ་ལེགས།
———
| Date | 06/02/2011 |
|---|---|
| By | འབྲི་གུང་དཀོན་མཆོག་འཕྲིན་ལས། |
| Subject | ཁམས་བཟང་ས་འཛིན་དཀར་པོའི་དོ་དམ་པ་ལགས། |
སྐུ་ཉིད་ནས་དོ་དམ་དང་གསར་བཟོ་བྱས་པའི་ས་འཛིན་དཀར་པོ་ཞེས་པའི་དྲྭ་ཚིགས་ནི་ང་ཚོའི་འདས་པའི་ལོ་རྒྱུས་ལ་ཕྱི་མིག་བྱེད་སའི་རྒྱང་ཤེལ་དང་། ད་ལྟའི་གནས་བབ་གླེང་སའི་བར་སྟོང་། མ་འོང་པའི་ཕུག་བསམ་ལ་ཁ་ཕྱོགས་སའི་ལམ་བུ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
———
| Date | 22/02/2011 |
|---|---|
| By | བུ་མོ་བདེ་གཡང་། |
| Subject | Re: ཁམས་བཟང་ས་འཛིན་དཀར་པོའི་དོ་དམ་པ་ལགས། |
ངོ་མ་ཡག་པོ་འདུག
———
| Date | 27/03/2011 |
|---|---|
| By | དཀོན་མཆོག་བོད་རང་བཙན། |
| Subject | འཚམས་འདྲི། |
ས་འཛིན་དཀར་པོའི་དྲ་ཚིགས་ལ་བཀྲ་ཤིས་བདེ་ལེགས་ཞུ། དངོས་གནས་ཧུར་བརྩོན་གནང་འདུག ད་དུང་མུ་མཐུད་ནས་དེ་ལྟར་གནང་རོགས།།
———
| Date | 26/08/2011 |
|---|---|
| By | གངས། |
| Subject | Re: འཚམས་འདྲི། |
བཀྲ་ཤིས་བདེ་ལེགས་ཞུ།
———
| Date | 02/09/2011 |
|---|---|
| By | ཐུབ་བསྟན་ཉི་མ། |
| Subject | ལེགས་གསོ། |
ཤེས་ཡོན་ཅན་རེ་རེའི་དེ་འདྲ་རེ་བྱོས་དང་། བོད་མི་རིགས་འདི་ཡར་རྒྱས་མྱུར་དུ་ཡོང་ངེས་པས་བཟང་།
———
| Date | 09/10/2011 |
|---|---|
| By | ནག་ཆུ་བ་བསྟན་འཛིན་ནོར་བུ། |
| Subject | འཚམས་འདྲིའི་ཆེད་དུ། |
ངོ་མ་དྲ་བ་་འདི་མིང་དོན་གཉིས་ཁ་ཁ་ཆགས་མི་འདུག། བཀྲ་ཤིས་བདེ་ལེགས་གྲངས་མེད་བཞུ།
Contact
ས་འཛིན་དཀར་པོ།རིག་བརྒྱ་སྒོ་མོའི་ཕྱེ་བས་དྲ་རྒྱ་ནང་། །
སྐྱིད་སྡུག་སྣ་མང་འདྲེས་པའི་གླེང་མོལ་ཞིག། །
རང་རང་བདེ་སྡུག་སེལ་བའི་མེ་ལོང་ཡོད། །
རེ་དོགས་ཀུན་གཅོད་ཤེས་པའི་རལ་གྲི་ཡོད།།
zwilling2007@gmail.com
+64.94224069
ས་འཛིན་དཀར་པོའི་དྲ་ཚིགས་ལ་ཕེབས་པར་དགའ་བསུ་ཞུ།
Poll
སྐུ་ཉིད་ས་འཛིན་དཀར་པོའི་དྲ་ཚིགས་དེར་ལེགས་ཉེས་གང་འདྲ་ཞིག་མཐོང་ངམ།
News
༧གོང་ས་ཐམས་ཅད་མཁྱེན་པ།
15/01/2011 13:34
༈ གངས་རིའི་ར་བས་བསྐོར་བའི་ཞིང་ཁམས་སུ། །ཕན་དང་བདེ་བ་མ་ལུས་འབྱུང་བའི་གནས། །སྤྱན་རས་གཟིགས་དབང་བསྟན་འཛིན་རྒྱ་མཚོ་ཡི། །ཞབས་པད་སྲིད་མཐའི་བར་དུ་བརྟན་གྱུར་ཅིག །
———
དཔལ་༧རྒྱལ་བ་འབྲི་གུང་པ་མཁྱེན་ནོ།།
14/01/2011 16:19
༈ དཀོན་མཆོག་རིན་ཆེན་གསུམ་གྱི་ངོ་བོ་ཉིད། །རྒྱལ་བསྟན་འཛིན་པ་སྤྲུལ་པའི་པད་དཀར་འཆང་། །དོན་ཀུན་བཟང་པོ་སྤྱན་གྱིས་གཟིགས་མཛད་པ། །འཕྲིན་ལས་ལྷུན་གྲུབ་བསྐལ་བརྒྱར་ཞབས་བརྟན་ཤོག །
———
༧རྒྱལ་བ་འབྲི་གུང་པ་མཁྱཻན།
15/01/2011 13:52
༈ དཀོན་མཆོག་གསུམ་གྱི་བསྟན་པ་འཛིན་པ་ལ། །ངག་གི་དབང་ཕྱུག་རྗེ་བཙུན་འཇམ་པའི་དབྱངས། །ཐུབ་བསྟན་རིན་ཆེན་སྒྲོན་མེ་འདེགས་མཛད་པ། །ཆོས་ཀྱི་སྣང་བ་བསྐལ་བརྒྱར་ཞབས་བརྟན་ཤོག །
———
ལྔ་ལྡན་ཚིག་རྐང་བརྒྱད་མ། མཁན་ཆེན་དཀོན་མཆོག་རྒྱལ་མཚན།
22/02/2011 13:01
ལྔ་ལྡན་ཚིག་རྐང་བརྒྱད་མ། མཁན་ཆེན་དཀོན་མཆོག་རྒྱལ་མཚན།
དལ་འབྱོར་རྙེད་དཀའ་འཇིག་པའི་ཆོས་ཅན་ཏེ། །འཁོར་བ་སྡུག་བསྔལ་རྒྱུ་འབྲས་གནས་ལ་འབད། །བསླུ་མེད་སྐྱབས་གནས་དཀོན་མཆོག་གསུམ་དུ་ངེས། །བྱམས་དང་སྙིང་རྗེ་བྱང་ཆུབ་སེམས་མཆོག་བསྒོམ། །དག་པ་ལྷ་སྐུ་རབ་འབྱམས་གཞལ་ཡས་སུ། །ཡིད་བཞིན་ནོར་བུ་སྐུ་བཞི་དབྱེར་མེད་གསལ། །ལྷན་སྐྱེས་འོད་གསལ་མ་བཅོས་གཉུག་མའི་གཤིས། །འཁོར་འདས་དགེ་ཚོགས་རོ་གཅིག་ཀློང་དུ་བཏབ། །ཅེས་འབྲི་གུང་བཀའ་བརྒྱུད་ཀྱི་མཁན་ཆེན་དཀོན་མཆོག་རྒྱལ་མཚན་མཆོག་གིས་མཛད་པའོ།། །།
———
སྲོང་བཙན་དཔེ་མཛོད་ཁང་།
14/01/2011 15:02
སྲོང་བཙན་རྒྱལ་སྤྱིའི་དཔེ་མཛོད་ཁང་འདི་ནི། དྭགས་བརྒྱུད་བསྟན་པའི་མངའ་བདག་དཔལ་༧རྒྱལ་བ་འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག་གིས། ཡུན་རིང་ཐུགས་ལ་བརྣགས་པའི་གལ་ཆེའི་དགོངས་གཞི་ཞིག་ཡིན་པ་མ་ཟད། དཔེ་མཛོད་ཁང་འདི་རྒྱལ་གར་གཞུང་ཐེབས་རྩ་ལྷན་ཁང་གི་དེབ་སྐྱེལ་ཁྲིམས་སྲོལ་གཞིར་བཟུང་ཐོག་སྲིད་དོན་དང་འབྲེལ་བ་མེད་པའི་རིག་གཞུང་རྐྱང་པའི་ཚོགས་སྡེ་ཞིག་ཡིན། དཔེ་མཛོད་ཁང་འདི་ནི། བོད་དང་ཧི་མཱ་ལ་ཡའི་རིག་གཞུང་ཞིབ་འཇུག་བྱེད་སའི་ལྟེ་གནས་ངོ་མ་དང་། འབྲེལ་ཡོད་ཤེས་བྱའི་ཡིག་ཆ་གལ་ཆེའི་རིགས་མཁོ་སྒྲུབ་ཀྱིས་ཉར་ཚགས་དང་ཞིབ་འཇུག པར་སྐྲུན་སོགས་ཀྱི་ཐད་ལ་ལས་དོན་བསྒྲུབ་རྒྱུ་ཡིན།
དཔེ་མཛོད་ཁང་འདིའི་འཛུགས་སྐྲུན་ནི་སྤུ་རྒྱལ་ཐོག་མ་གཉའ་ཁྲི་བཙན་པོས་སྲིད་ལོ་(སྤྱི་སྔོན་༣༦༠ ནས་ སྤྱི་སྔོན་༣༤༠) རིང་ལ་གསར་བཞེངས་གནང་བའི་བོད་གངས་ཅན་གྱི་ཡུལ་དུ་མཁར་ཐོག་མ་ཡུ་མོ་བརླ་མཁར་ཞེས་པའི་དཔེ་དབྱིབས་ལ་གཞི་བླངས་ཏེ་རྡོ་རྩིགས་རྐྱང་པ་ལས་གྲུབ་པ་དང་། ནང་དུ་དེང་དུས་ཀྱི་སྒྲིག་གཤོམ་དང་། བོད་ལུགས་ཀྱི་སྐུ་རྟེན། ཆེས་སྔ་ཤོས་ཀྱི་མཛེས་རིས་སོགས་ཀྱིས་བརྒྱན་ཡོད་པ་རེད། དཔེ་མཛོད་དང་ཚོགས་ཁང་། ལས་ཁུངས་དང་ཟ་ཁང་བཅས་ཁྱོན་ཁང་མིག་གྲངས་༧༥ རྒྱ་ཁྱོན་སྤྱི་ཁྲེ་གྲུ་བཞི་མ་ (sq.meter) ༡༥.༣༠༠ ཡོད་པ་རེད།
བོད་རྒྱལ་ལོ་ ༢༡༣༠ ༡-༣ སྤྱི་ལོ་ ༢༠༠༣ ༣ - ༦ ཉིན་༧གོང་ས་ལྷ་མིའི་རྣམ་འདྲེན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་སྒོ་འབྱེད་མཛད་སྒོའི་བཀའ་དྲིན་བསྐྱངས་པ་དང་། སྤྱི་ལོ་ ༢༠༠༣ ལོའི་ཟླ་ ༣ ཚེས་ ༢༩ ནས་ཟླ་ ༤ ཚེས་ ༢ བར་སྲོང་བཙན་རྒྱལ་སྤྱིའི་ཚོགས་འདུ་ཐེངས་དང་པོ། བོད་ཀྱི་བརྡ་སྤྲོད་སྐད་ཡིག་རིག་པའི་སྐོར་ལ་ཚོགས་འཛོམས་གནང་བ་རེད།
———
———
All articles———
Items: 1 - 6 of 6
ནད་ལ་སོགས་པ་ལམ་དུ་འཁྱེར་ཚུལ།
རྩོམ་པ་པོ། རྒྱས་སྲས་ཐོགས་མེད་བཟང་པོ།
ན་མོ་གུ་རུ། བདག་གཞན་སྒྱུ་ལུས་ཀྱི་ཕུང་པོ་འདི། ། ན་ན་ན་སྟེ་ན་བས་དགའ། །སྔར་བསགས་ཀྱི་ལས་ངན་འཛད་པ་ཡིན། །ཆོས་སྤྱོད་ཀྱི་བྱ་བ་སྣ་ཚོགས་ཀྱང་། །སྒྲིབ་གཉིས་སྦྱང་བའི་ཆེད་དུ་ཡིན། །ན་བ་མེད་ན་མེད་དེ་དགའ། །ལུས་སེམས་བདེ་ན་དགེ་སྦྱོང་འཕེལ། །མི་ལུས་དོན་ཅན་བྱེད་པ་ཡང་། །སྒོ་གསུམ་དགེ་ལ་སྦྱོར་བ་ཡིན། །འབྱོར་པ་ཡོད་ན་ཡོད་དེ་དགའ། །བསོད་ནམས་ཀྱི་དགེ་ཚོགས་སྤེལ་བས་ཆོག །འཕྲལ་ཕུགས་ཀྱི་ཕན་བདེ་ཇི་སྙེད་པ། །བསོད་ནམས་ཀྱི་འབྲས་བུ་ཡིན་པར་ངེས། །མྱུར་དུ་ཤི་ན་ཤི་བས་དགའ། །རྐྱེན་ངན་གྱིས་བར་དུ་མ་ཆོད་ཅིང་། །མཚམས་སྦྱོར་གྱི་བག་ཆགས་བཟང་གྲོགས་པས། །མ་ནོར་གྱི་ལམ་དུ་ཚུད་པར་ངེས། །ཡུན་དུ་གསོན་ན་གསོན་པས་དགའ། །ཉམས་མྱོང་གི་ལོ་ཐོག་སྐྱེས་པ་ལ། །གདམས་ངག་གི་རླན་དྲོད་མ་ཡལ་བར། །ཡུན་དུ་བསྟེན་པས་སྨིན་པར་འགྱུར། །གང་ཡིན་ཡང་དགའ་བ་སྒོམས་ཤིག་ཨང་། །
ཞེས་པ་ས་སྐྱར་དགེ་བཤེས་ཤིག་གིས་ནད་ལ་སོགས་པ་བྱུང་ན་ཇི་ལྟར་བྱེད་དྲིས་པའི་ལན་དུ་ནད་ལ་སོགས་པ་ལམ་དུ་འཁྱེར་བའི་ཚུལ་འདི། ཆོས་སྨྲ་བའི་བཙུན་པ་ཐོགས་མེད་ཀྱིས་བཀོད་པའོ།། །། སརྦམངྒ་ལཾ། །